ഡിജിറ്റല് പേയ്മെന്റ് ഈസിയാക്കുന്ന ഇ-റുപ്പി സേവനം രാജ്യത്തിന് സമര്പ്പിച്ച് പ്രധാനമന്ത്രി
രാജ്യത്തെ ഡിജിറ്റല് പേയ്മെന്റ് സംവിധാനത്തിന് കൂടുതല് ഊര്ജ്ജം പകരാന് പ്രധാനമന്ത്രി നരേന്ദ്ര മോദി് രാജ്യത്ത് ഇ-റുപ്പി സേവനത്തിന് തുടക്കം കുറിക്കും. നാഷണല് പേയ്മെന്റ് കോര്പ്പറേഷന് ഓഫ് ഇന്ത്യയാണ് (എന്പിസിഐ) ഇ-റുപ്പി വികസിപ്പിച്ചത്. ധനകാര്യ സേവന വകുപ്പ്, ആരോഗ്യ-കുടുംബക്ഷേമ മന്ത്രാലയം, ദേശീയ ആരോഗ്യ അതോറിറ്റി എന്നിവയുമായി സഹകരിച്ചാണ് ഇലക്ട്രോണിക് വൗച്ചര് അധിഷ്ഠിത ഡിജിറ്റല് പേയ്മെന്റ് സംവിധാനം നാഷണല് പേയ്മെന്റ് കോര്പ്പറേഷന് ഓഫ് ഇന്ത്യ (എന്പിസിഐ) യു.പി.ഐ. പ്ലാറ്റ്ഫോമില് വികസിപ്പിച്ചെടുത്തിട്ടുള്ളത്.
ഡിജിറ്റല് പേയ്മെന്റിന്റെ കറന്സി രഹിതവും സമ്പര്ക്കരഹിതവുമായ മാര്ഗമാണ് ഇ-റുപ്പി. ഇത് ഒരു ക്യു.ആര്. കോഡ് അല്ലെങ്കില് എസ്.എം.എസ്. സ്ട്രിംഗ് അധിഷ്ഠിത ഇ-വൗച്ചര് ആണ്. ഗുണഭോക്താക്കളുടെ മൊബൈലിലേക്ക് നേരിട്ടാണ് ഈ വൗച്ചര് എത്തുക. ഇ- റുപ്പി പേയ്മെന്റ് സേവനത്തിന്റെ സഹായത്തോടെ, കാര്ഡ്, ഡിജിറ്റല് പേയ്മെന്റ് അപ്ലിക്കേഷന് അല്ലെങ്കില് ഇന്റര്നെറ്റ് ബാങ്കിംഗ് ആക്സിസ്സ് തുടങ്ങിയവയുടെ സഹായം ഇല്ലെതെ തന്നെ ഉപഭോക്താവിന് വൗച്ചര് റിഡീം ചെയ്യാന് കഴിയും.
സ്പോണ്സര്മാരെ ഗുണഭോക്താക്കളുമായും സേവനദാതാക്കളുമായും ഒരു ഫിസിക്കല് ഇന്റര്ഫേസ് ഇല്ലാതെ ഡിജിറ്റല് രീതിയില് ബന്ധിപ്പിക്കാന് ഇ-റുപ്പി വഴി സാധിക്കും. ഇടപാട് പൂര്ത്തിയായതിനുശേഷം മാത്രമേ സേവന ദാതാവിന് ഇ-റുപ്പി ഉപയോഗിച്ച് പണമടയ്ക്കാനാകൂ. പ്രീ-പെയ്ഡ് സ്വഭാവത്തിലുള്ളയാതിനാല് ഇടനിലക്കാരന്റെ പങ്കാളിത്തമില്ലാതെ സേവന ദാതാവ് കൃത്യസമയത്ത് പണമടയ്ക്കുന്നത് ഇത് ഉറപ്പാക്കുന്നു.
നിലവില് മാതൃ-ശിശുക്ഷേമ പദ്ധതികള്, ടി.ബി. നിര്മാര്ജന പരിപാടികള്, ആയുഷ്മാന് ഭാരത് പ്രധാനമന്ത്രി ജന് ആരോഗ്യ യോജന തുടങ്ങിയ പദ്ധതികള്ക്ക് കീഴില് മരുന്നുകളും ഡയഗ്നോസ്റ്റിക്സ് സേവനങ്ങളും ലഭിക്കാന് ഇത് ഉപയോഗിക്കാം. വളം സബ്സിഡി തുടങ്ങിയവയ്ക്കും ഇ-റുപ്പി സംവിധാനം ഉപയോഗിക്കാം. സ്വകാര്യമേഖലയ്ക്ക് ഈ ഡിജിറ്റല് വൗച്ചറുകളെ അവരുടെ ജീവനക്കാരുടെ ക്ഷേമ പ്രവര്ത്തനങ്ങള്ക്കും കോര്പ്പറേറ്റ് സാമൂഹിക ഉത്തരവാദിത്ത പരിപാടികളുടെയും ഭാഗമായി പ്രയോജനപ്പെടുത്താന് സാധിക്കും.
